Yuxumu qarışdırmışam

Yuxumu qarışdırmışam...

əqrəbdən asılan fikirlər

udur gecə saatlarını,

zamansız qaranlıq asılıb pəncərədən

ayın son işartıları yox olur göy üzündən,

əriyən gecə səhərə doğru axır,

pərdənin solan gülləri

maddım-maddım üzümə baxır.

Xəfif, çox xəfif bir rüzgar əsir

dolaşıq düşüncələrdən.

Olmadığım gecə hələ qurtarmamış

səhərın gümanları yapışıb

qapımın darıxan dəstəyindən.

Qulağıma qışqırır itən zaman,

dağılır boş məkan,

bu gecə sən yoxsan yuxularımda,

bu gecə mən də yoxam yuxularında.

Gecə də mənim deyil gündüzlərim tək

zamansız qaranlıq asılıb pəncərədən.

Zamansız qaranlıqda

həsrətim, intizarım,

zamansız qaranlıqda

saatın əqrəbindən

asılı qalmışam mən...

                                                                 2009

Vitrindəki pаltаrlаr

alıcısını gözləyən vitrindəki pаltаrlаr

utаnаr yаmаn,

utаnаr zаmаn-zаmаn

kirаyənişin bədənə

gеyinilib sоyunulmаqdаn

vitrindəki pаltаrlаrın

«аpаr məni, аpаr məni» dеyən,

yаlvаrаn bахışlаrı

uzаnаr..., uzаnаr qаpıyаcаn   

vitrindəki pаltаrlаr

bir аnlıq хоş bахışlаrа аldаnаr

vitrindəki pаltаrlаr

umud asılqanındаn asılаr

gеcədən səhərədək

vitrindəki pаltаrlаr

хəyаllаrındа

bir isti bədənə sığınıb gəzər

yaz gecələrində,

şəhərin tənha küçələrində.

                                  31.01.2008

Darıxan gecə

Bu darıxan gecədə

nə dənizin dalğası,

nə də ki bir kölgə var

üzümə toxunası.

Bu gecə qonaq ay yox

mənimlə söhbətləşə,

bu lal-dinməz gecədə

dərdlərimiz dərdləşə.

Bu darıxan gecəni

qaranlığın qoynunda

səhərə daşıyıram

əllərimin içində.

     

                              03.01.2011

Dəniz sahilində

Göydən baxan baxışlar,             

məni sevir, bağışlar,

bu yuxular qoynunda,

bu tənhalıq içində.

Sahillərdə hasarlar,

aşsam məni asarlar,

saralmış əncirindən,

meynəli kəndirindən.

Qayasında gül oldum,

bağında bülbül oldum,

dibində lal, dənizin,

ləhcəsi bal, dənizin.

                           05.03.2011                                                                

Sevgi nəğməsi

Sənin çətirini alan küləyin               

öpüşü qonacaq yanaqlarına,

enəcək, enəcək bir az aşağı -

o solan, göyərən dodaqlarına.

Bu yerin, bu göyün heç bilmədiyi,

ayın duymadığı, eşitmədiyi,

bir sevgi nəğməsi oxuyacağam

qara buludların qulaqlarına.

Daha bu əllərim çətirdi sənə,

o mil-mil barmağım pərdələnibdi,             

mənim baxışlarım şimşəkdən iti,

bulud pərən-pərən səpələnibdi.                    

Çırpdım küləkləri boz qayalara,

söndür, söndür məni, alışacağam,

mənim coşan sinəm yelkən kimidi,                       

dəniz dodağından yapışacağam.

O baxış ola

Tanrının sevimli bəndəsi kimi                 

bəxtinə yazılan bir naxış ola.

Üzünə dikilən, gözünə baxan,

sənin istədiyin o baxış ola.

Qəfil ay boylana gecənə sənin,

ulduzdan özünə çələng hörəsən.

Tutub əllərindən bir mələk kimi

sevgi qollarında hey yellənəsən.

Ürkək meh oxşaya üzdə telini,

könlünə bir xəfif sevda toxuna.

Sənin dodağında gəzən pıçıltı

mənim qulağımda gəlib oxuna.      

                                                        17.01.2016

Sənin otağında

Sənin otağında bilməm nə harda...

baxışlar, xəyallar hardan asılıb,

hardan gözlərinə işıq düşəcək                              

divardan asılan xəyal şəklimin.

Sənin otağında mənim yerim nə,

məkanım, məskənim, gümanlarım nə?

Sənin ürəyində yerim, o məlum.

Sənin otağında hardayam, harda?

Evdə əlindədir bil ixtiyarım,

istəsən miz üstə qoyub baxarsan,

istəsən diz üstə qoyub baxarsan,

qulaq yaddaşında sözdən asarsan,

baxışdan asarsan, gözdən asarsan...

Hərdən yatağına uzat dincəlim,

sevinsin, yaşasın sənli günlərim.

Sənin ürəyində yerim, o məlum.

Sənin otağında hardayam, harda?

Səni darıxmağa qoymaram daha

o mənli, o mənsiz otağında da...

                                                                          22.12.2012