Təzadlı gecə

Hər an haldan-hala düşən adamtək

təzadlı gecəni yaşamaq çətin...

Ömür səhnə deyil, gecələr pərdə

çəkəsən sitəmin üstünə, dərdə...

Dəyişər əhvalın mehsiz, küləksiz,

səni dəlib keçər hər şey yel kimi.

Tutar ürəyindən, dəyişər halın       

sübhətək ağaran qara tel kimi.

Səhərə hələ bir uzun gecə var

uzanar bu gecə zülmət dərətək,

daşıyar yuxulu - ölü adamı

səhər sahilinə yumşaq bərətək.

Kiminin nəfəsi çatar səhərə,

kimi qaranlıqda boğulub gedər,

kimi yuxularda gələr dünyaya-

gecənin bətnindən doğulub gedər.

Hər an haldan-hala düşən adamtək

təzadlı gecəni yaşamaq çətin...

ömür səhnə deyil, gecələr pərdə

çəkəsən sitəmin üstünə, dərdə...

                                                          07.07.2013